1993 жылдың 12 қарашасында "ҚР ұлттық валютасын енгізу туралы" жарлық шықты. 1993 жылы 15 қарашада теңге айналымға енді.
Елімізде ақша басатын фабрика болмағандықтан алғашқы банкноттар Лондондағы Harrison & Sons фабрикасында шығарылды. Қазақстан ақшасы Ұлыбритания патшайымының Алтын белгісіне ие болды.
Ұлттық банк бастапқыда 1 теңгені сол кездегі 1000 рубльге бағалаған болатын. Еліміздің саяси, әлеуметтік мәселелері және мемлекетаралық қатынастар ескеріліп 1 теңге 500 сомға тең деп бекітілді.
"Әлем білетін қазақ болуға тиіс" деген оймен 1 теңгелік банкнотта Әбу-Насыр әл-Фарабидің портреті бейнеленді. 5 теңгеде – Құрманғазының портреті, 10 теңгеде – Шоқан Уәлихановтың портреті.
Ұлттық валюта атауына "алтын", "ақша", "танга" нұсқалары ұсынылды. Қазақстандық валютаны тіпті "сом" деп атау жоспарланған. ХV ғасырда Отырар қаласында "танга" атауымен басылып шыққан күміс монетаға ұқсастырып "теңге" деп атау туралы шешім қабылданды. Жүз есе бөлігі "тиын" деп аталды.
"Портреттер" айналымының бірінші сериясында ең құнды банкнот – Абылай хан бейнеленген 200 теңге. 3 теңгеде – Сүйінбайдың портреті, 20 теңгеде – Абай Құнанбаевтың портреті, 50 теңгеде – Әбілқайыр ханның портреті бейнеленді.
Қазақстанның өз монета сарайы болмағандықтан қағаз тиындар басылды. 1994 жылы олардың орнына жезден жасалынған 2,5,10, 20 және 50 номиналды монеталар шықты. Қазір банкноттар Ұлттық банктің Алматы қаласындағы Банкнот фабрикасында, ал монета Өскемендегі Монета сарайында шығарылады.
1993 жылдан бері теңгенің төрт сериясы басылды: "Портреттер", "әл-Фараби", "Бәйтерек" және "Самұрық". Қазір айналымдағы қағаз банкноттар – 200, 500, 1000, 2000, 5000, 10000 және 20000 теңге, тиындар – 1-2-5-10-20-50, 100 және 200 теңге.
Теңгенің қорғаныс дәрежесі әртүрлі. Аз ақша бірлігінде қорғаныс белгілері де аз. Мысалы, 200 теңгенің қорғанысы 10 мың теңгеден әлсіз. Соңғы шыққан банкноттарда суреттердің бедерлігі, сутаңба, бояулардың металл жылтырлығы, өлшемі әртүрлі сандар, ультрафиолет қорғанысы, сериялық нөмірлер, сәйкес кескіндер секілді 18 қорғаныс дәрежесі бар.
Теңге бірінші айналымға кірген күні 1 доллар 4,75 теңге болып бекітілді. Бүгінде 1 АҚШ доллары 465-475 теңгеге тең. 29 жылда 100 есе өсті деуге болады. Биыл наурызда 1 доллар бағамы 520 теңгеге жетті.